(o quin un tròç de metau torçut e ua pelòta de hiu qui’s poden transformar en obratge vertadèr !)
Que disem « cluishet » e eth monde que s’imagina ua mameta dab un cabilh qui compta eras suas malhas. Vertadièra enganada. Eth cluishet qu’ei en realitat ua arma secreta mès era sua arreconeishença n’ei pas encara pro grana.
1. Teleportacion temporau exprès
Que t’assietas entà « un petit arreng ». Tres òras mes tard, qu’arrealisas que n’as ne minjat, ne bevut, ne vist càger era nuèit… Qu’ei era sola maquina entà viatjar dens eth temps qui non còsta pas que 5€ ara merçaria deth canton.
2. Tensiomètre shens consultacion
S’avètz un dobte sus era vosta tension, que sufeish de gaitar eras vostas malhas. Mes e son seradas, mes ètz tenuts. Pensatz a plan arrespirar, normaument qu’ei un léser entà passar un bon moment !
3. Asimant sociau
Tren, parque, sala d’espèra o estanquet : quauqu’un que vendrà forçadament vos demandar « Oh qu’ei tan beròi, qu’ei de tricòt ? », e tu d’arrespóner, dab un gran arríder en tot demorar zen : « Non, qu’ei de CLUI-SHET ». Que pòt arrepresentar un vertadièr punt d’arrendetz-ve entà un grop de personas qui s’amassan mantuns còps per mes e qui demoran aquò dab hèra d’enveja.
4. Generator de presents de darrèra minuta
Qu’avetz desbrembat un anniversari ? O besonh d’un present unic ? Prenguetz un cluishet e un pelòta de lan e eth arresult que serà forçadament ath arrendetz-ve. Que sia un petit vestit o ua plan sharmanta petita monaca, que i a hèra de possiblitats dab aquest’utís, que cau sonque hèr hidença ara sua creativitat.
5. Aprentissatge dera paciéncia
Comptar 198 malhas shens pèrder eth hiu (literaument), desbrocar 20 arrengs pr’amor qu’as mancat ua brida… Se lançar dens ua creacion dera debuta dinc ara fin qu’ei ua grana pròva de paciéncia e de concentracion. Que devem passar per mantuns estats emocionaus entà acabar un obratge mès qu’ei entà ua bona causa !
Moralitat
Eth cluishet, qu’ei plan mes qu’un solaç. Qu’ei un supèr-poder en metau e coton : qu’apaisima, qu’apressa, qu’esmiragla. Que cau sonque díser adiu e planvenguda ara vosta creativitat, non pas aver paur d’enganar-se e sustot que cau demandar de l’ajuda tre qu’avem un dobte. Qu’ei ad aquèth moment que cream un quauqu’arren de vertadièrament beròi ena creacion, amassa.
Punt finau, malha colada, ridèu.
Anaís Abadie
dab er’ajuda de Brunò Fourcade
Laisser un commentaire