Era descubèrta…
Qu’èri debutanta. Qu’èri regenta remplaçaira enera educacion nacionau dempuish duas annadas. Qu’aviái vist mantuas escòlas e quan que dintravi en ua classa eth maitin, qu’èri acostumada a sentir un ambient de grop. Daubunas classas qu’esperavan passivament d’aver mots directius era jornada tota. Que comptavan sus jo enà les menar sus eths senders dera coneishença e sus era organizacion dera classa. Pr’aquò, que coneishian mélher lor classa que jo que desbarcavi ! Mès eth biais qu’ èra de seguir eth adult shens pausar questions. D’autras classas qu’èran mès viuas e eths macipons que se permetián de m’explicar lor fonccionar.
E puish, un dia de gèr 2022, qu’arrivèri en un canton de calandreta, un maitin, en ua classa multinivèus deth CE1 ath CM2. Aquí, a 9 oras, eth bornac que comencèc son òbra. Shens les convidar a començar era classa, eths macipons que vengueren assieta’s amassa. Un d’eths que prenguèc era paraula enà hèr era crida. Puish, un aute qu’organizèc un « Quin vas ? ». Puish, un aute que propausèc trocets petits de matematicas enà revisar amassa. Que durèc atau 15 minutas. Quan un mainat qu’è’s butava a hèr eth piòt, un aute que le rampelava eras leis deth canton. E jo, qu’èri com densh un aute país. Totis que parlavan occitan. Totis avián lor plaça densh aquera classa que semblava tant viua !!!
Eths ligams e era pelòta de lana…
Qu’èri novelària, qu’é a díser, debutanta en Calandreta. Accompanhada peras regentas dera escòla, qu’è descubèrt pendent 3 annadas era pedagogia calandreta. Qu’è sentit era importància deths ligams. Aquí, que’ns parlam e nos dincontram. Eths macipons qu’s parlan en cercle, entre eths e dam eths adultes dera classa, dam utisses nà aprénguer a escota’s e a arrespectar era diversitat de pensada. Eth conselh de regentas que permet d’aver un espaci d’escambis, cadrat e previst. Que i a tanben eths CA dam eths parents qu’enròda er’escòla. Aquí, tanben, eth cadre de tribalh que permet a cadun d’aver ua plaça precisa densh eth fonccionar deth bornac. Com novelaris, qu’assistiám aras amassadas cinc còps cada mes per confrontar nòstas practicas de classa.
De canton en canton, qu’é com ua pelòta de lana dam ligams densh era classa, puish entre regentas, puish entre classas, puish dam parents, puish entre d’autas escòlas… eth hiau que se desrotla encara e encara…
Puish eth congrès… d’autas escòlas, un centre de formacion, recèrcas,… Aquí, se desrotla era pelòta… e qu’è realizat qu’èra gigantesc aqueth hiau, solid e tot doç , e que s’apèra Moviment Calandreta…
Váder ua regenta de Calandreta … qu’é tot un camin… mès que sembla més a ua rondalejada en montanha qu’a ua passejada tranquilla ara broa de mar… Urosament, nosautis, qu’èm plan asseguradas dam ua bona còrda compausada de hiaus solides. Qu’é un deths pilars deras Calandretas : hèr escòla amassa !
Nadià Riboulet dam era ajuda de Manon Pujol e eras còlas A1 e A2 d’APRENE
Laisser un commentaire