Lo plan de trabalh es una organizacion pedagogica que permet als escolans de realizar, sus un periòde precís, un ensemble d’activitats estructuradas e clarament identificadas. Al revers del trabalh impausat collectivament e simultanèament, ofrís a cadun la possibilitat d’avançar a son ritme, de causir l’òrdre de las tascas e de desvolopar una vertadièra responsabilitat cap als aprendissatges. Pensat coma un quadre sople mas exigent, transforma lo rapòrt al trabalh e installa una dinamica mai serena dins la classa.
L’autonomia de l’escolan se tròba al còr del dispositiu. Gràcias al plan de trabalh, lo mainatge apren a se localizar, a anticipar, a gerir son temps e a se disciplinar. Es pas tot sol : las consignas son claras, las aisinas son accessiblas, las etapas son claras. Pichon a pichon, gausa prene iniciativas, s’engatja mai e s’apròpria sos aprendissatges. La libertat de causida non es pas totala, mas enquadrada, çò que rassegura los escolans en los menant a se faire mai responsables. Lo plan de trabalh deven atal un vertadièr levador d’assegurança, perque l’escolan constata sos progrèsses, s’organiza e capita d’esperel.
La diferenciacion pedagogica es tanben una fòrça magèr del dispositiu. Lo plan de trabalh permet d’adaptar las tascas, lor quantitat, lor dificultat o lor forma, segon los besonhs de cadun. D’unes escolans pòdon aprigondir, d’autres assolidar, d’autres encara tornar trabalhar una competéncia mai de temps. Atal, cadun progrèssa sens èsser ralentit o mes en dificultat pel ritme collectiu. I a pas mai un sol camin per aprene, mas mai d’un trajècte possible, concebuts per respondre a la diversitat dels escolans. Aquesta diferenciacion integrada al foncionament quotidian contribuís a reduire los escarts e a valorizar las capitadas individualas.
L’ensenhaire, dins aqueste encastre, vei son ròtle evoluar. Es pas mai unicament lo que transmet fàcia al grop, mas lo qu’obsèrva, acompanha, guida e regula. Lo plan de trabalh li ofrís una vision mai fina dels besonhs reals dels escolans, perque libèra de temps per las interaccions individualas o en pichons grops. Permet tanben d’avalorar autrament, de seguir los progrèsses de setmanas en setmanas, e d’ajustar las activitats en foncion de las empachas encontradas. L’ensenhaire ven un arquitècte dels aprendissatges, organiza l’encastre per que cadun i pòsca créisser cap e tot.
Fin finala, lo plan de trabalh es una aisina poderosa per transformar la vida de classa. En desvolopant l’autonomia, en favorizant la diferenciacion e en tornant definir la postura de l’ensenhaire, concep un environament mai calm, mai eficaç e mai respectuós dels ritmes de cadun. Es un autre biais d’aprene, actiu, personalizat e uman.
Haidi D’Hulst
Amb l’ajuda de Sandrà Bernard
Laisser un commentaire