Dins los òrts ensolelhats del Miègjorn, sus las còlas rocalhosas e aridas, creis una planta modèsta mas poderosa e resistenta : la farigola. Aquesta planta aromatica, tant aimada per son perfum dins la cosina, es tanben una vertadièra medecina naturala.
Una planta magica, eissuda d’una tèrra arida.
La farigola es un antiseptic natural. Ne podem botar dins de recèptas ambe de carn, dins la sopa amb un flòc garnit o encara dins la tisana.
Per s’aparar del freg, botam de farigola dins l’aiga bolida, dins una bona tisana ambe de mèl e nos ajuda a combatre lo raumàs e las anginas.
La tisana de farigola : lo remèdi per l’ivèrn.
Res de mai simple que d’aprestar una infusion de farigola.
- Prene un culhièr de fuèlhas secas (o un ramelet fresc).
- Lo botar dins una tassa amb d’aiga esbolhentada.
- Cubrir e daissar infusar 5 a 10 minutas.
- Filtrar e apondre de mèl e lo chuc d’una mitat de limon.
Podètz tanben apondre de fuèlhas de verbena amb la farigola per apondre un bon gost en mai de sas proprietats apasimantas per un sòm melhor.
Aquesta tisana ajuda a liberar las vias respiratòrias, a apasimar los tossiments e afortís lo sistèma immunitari.
D’autras utilizacions de la farigola :
La farigola se pòt tanben emplegar :
- En inalacion per descongestionar lo nas.
- En gargarisme per las dolors de garganta.
- En cosina, dins l’aiga bolida ambe d’alh, de sàlvia, de sal, d’òli d’olivas per facilitar la digestion e per afortir l’organisme.
Una tradicion que tòrna :
Amb lo retorn a las medecinas naturalas e los sabers populars, la farigolatòrna trapar una plaça sus las nòstras taulas e dins los nòstres armaris. Es pas sonque una aromata per perfumar la carn o las leguminosas : es un tresaur de santat !
Ara que l’ivèrn s’aprèsta a picar a la pòrta, pensatz de vos far una bona tisana de farigola !
Estela amb l’ajuda d’Annia Pla
Laisser un commentaire