Eth umus deth món

Umus : jaça superiora deth sòu formada pera matèria organica descompausada.

D’un biais més poetic, eth umus que representa era vita que’s neuri dera mòrt ath briu deth temps qui passa.

Aquiu un concept abordat en era mòstra « eth umus deth món », exposicion que pòt visita’s ath castèth d’aiga de Tolosa de noveme 2025 a març 2026.

Eth umus deth món que mos convida en un monde poetic e critic de Sophie Zénon. Qu’é ua artista que questiona era memòria, istòria e eth temps que passa. Era plaça deth soviéner, nòste rapòrt ath desbremb, ara pèrta, ar’abséncia e ara mòrt que son questionnats. Era artista que mescla matièras e autis artistas (escrivans, fotografas, poètas,…) enà prepausar ua mòstra rica e plèa de diversitat.

Que trobam densh eth corredor un libe ventalh damb poesias cortetas sus era carnisseria dera guèrra illustrada peras fòtos deras mietats de caras : ua mietat d’un soldat francés associada a un auta mietat d’un soldat alemand. Aquera cara recomposada que sembla èster ua sola e medisha persona…quauqu’un nafrat pera guèrra.

Era linha de partatge entre eras duas mietats d’aquera cara, que’ns torna ara linha de demarcacion enter eths dus camps qui é desenhada sus era paret dera exposicion. Aquiu, hièstras deths abrics , deths boomkers… Un d’un costat dera linha e eth aute, que semblabla, deth aute costat. Dus camps… era guèrra medisha, era batalha medisha, era misèra medisha, era orror medisha, eras mapas medishas d’un medish bòsc damb noms d’endrets desconeguts nomenats peths soldats. A còps en francés, a còps en alemand. Eths noms d’aqueths endrets, inventats peths soldats que son manlèus dera sensualitat… Quan qu’arpentan eths camins d’aqueth bòsc, eths soldats que semblan descubrir eth còs d’ua hemna.

Eths uniformes deths soldats que transportan granas vengudas deths país de provenença deths soldats… e era tèrra macada, norishana pera sang deths òmis que s’empleish de plantas naveras. Aqueras plantas que s’aperan plantas obsidionalas.

Era guèrra que va acaba’s e eth paisatge que va demorar mercat e transformat. Eth umus deth sòu, plen de sang e de cadavres balha nescuda ara nautat…

Parièrs que s’afrontan e non parièrs que’s confonen. Termièras espessas enter òmis e plantas que s’esvaneishen. Era rusca que vad rauba.

Nàdia Riboulet