Los calandrins avèm viscut una setmana fòrça rica a Tolosa, marcada per l’aprendissatge, los escambis e una convivéncia totjorn presenta. Una parentèsi intensa ont la lenga occitana, la pedagogia e la cultura se son crosadas a cada moment.
Lo diluns, a l’Ostal d’Occitania, la setmana comencèt amb un acuèlh plan calorós. Maria Anna Poujade e l’equipa dels Aprene-2 nos recebèron amb de sorires, pendent que lo cafè acabava de se preparar e que l’odor nos ajudava a nos desrevelhar. Aquela doçor foguèt pas de tròp abans d’atacar una jornada… fòrça matematica ! Felip Joulié e Jany Gibert nos menèron dins de reflexions e de practicas intensas, tant que qualques cervèls fumavan. Una jornada exigenta, mas animada per un fòrça bon ambient e d’escambis dinamics.
Lo dimars foguèt consacrat a d’autres orizonts. Al matin, Quentin Pages nos faguèt descobrir cossí lo numeric e lo mond informatic pòdon èsser d’aisinas al servici de l’occitan. Una intervencion fòrça estimulanta, que mòstra que la lenga a tota sa plaça dins la modernitat. Lo tantòst, lo temps se pausèt amb lo cant amb Pascala Respaud, ausiguèrem la lenga dins sa forma mai sensibla, portada per las voses, l’emocion e lo plaser de cantar amassa.
Lo dimècres foguèt centrat sus la pedagogia institucionala. Una jornada fòrça interessanta, marcada per de discussions ricas, d’escambis francs e de reflexions prigondas sus nòstras practicas. Cadun poguèt portar son vejaire e s’enriquir de l’experiéncia dels autres.
Lo dijòus, visitèrem lo Castèl d’Aiga. L’exposicion fotografica prepausada nos convidava a pensar lo ligam entre la tèrra, la vida e la mòrt. Un moment fòrt, que preparèt plan lo tantòst, consacrat a Marcèla Delpastre. Joèla Ginestet nos ne parlèt amb fòrça sensibilitat, fasent ressonar la votz e lo caminament d’una figura essenciala de la literatura occitana.
La setmana s’acabèt amb una matinada dedicada a l’escòla inclusiva amb Mirelha Dedieu. Un temps fòrça interessant, ric en conselhs e en reflexions, que nos ajudèt a pensar una escòla mai dubèrta e mai respectuosa de totes los mainatges. Après lo conselh, foguèt ja l’ora del retorn a l’ostal.
Volèm adreiçar un grand mercés a totes los intervenents per la qualitat de lors intervencionse, a l’equipa dels Aprene2 pels conselhs, lor bona umor e la convivialitat, a Maria Anna per sas classas, son sorire e son acuèlh generós, e plan segur a la Federacion Miègjorn-Pirenèus Aprene, que rendèron possibla aquela setmana tan rica sul plan uman coma professional.
Victòria Soler e la còla
Laisser un commentaire