Quò fai chaud fuec de diu, 43 degrats sem un pauc coma dins lo desert mas sens lo sable, mos peissons an set e mon cactus creda per lo metre a l’ombra. Dins ma piscina quò es ieu que refreschisse l’aiga quand dintre dedins. A n’aqueste moment, lo solelh a pres la gròssa testa, benleu que se pensa dardalhant, per cas, quò es lo subjecte qu’auvem de pertot. Ah! la meteo, quò es lo moment de surtir totas nòstras expressions de circonstància : « Fai ‘na chalor a far cueire un z-uòu darrier un mur » o « fai ‘na chalor a far badar tots los luserts e tots los picataus dau país ». Sem clafits d’expressions per far la plueja e lo brave temps. En lemosin disem « lo diable marida sa filha » per dire que fai brave e meschant temps en mesme temps. Ueit frances sus dietz disen parlar de la meteo coma lors collegas de trabalh, quò es lor subjecte preferit dins las conversacions, davant los transpòrts e l’actualitat. Una enquesta IFOP a mostrat que 86% daus frances avián parlat au mens un còp de la meteo dins las doas darrieras setmanas. En queste moment, fau ben dire que la chalor es un bon subjecte breja glaça. La meteo quò es ‘na vertadiera passion per nòstre pòple romaire e bramaire. Parlar de meteo quand ela chamja e romegar quand ela chamja pas : l’ivern disem « vivament l’estiu ! » e l’estiu disem « vivament que quò fasa mens chaud !» Los 81 % daus frances consultan la meteo chasque jorn o presque, quò es pas greu si avem mancat lo jornau de 20 oras mas pas question de ratar la meteo. Quò es lo subjecte perfiech per eschamjar de las anecdòtas e discutir de l’evolucion dau climat: “Enquera la fauta daus americans e de lors veiturassas que desreglan la planeta”! Quand dins ‘na jornada auvem parlar çai que delai las gens se plánher dau temps que fai, e qu’avem pas pro de mans e de pès per contar lo nombre de planhs, podem parlar de negativisme meteorologic o lo fach de jamai èsser content dau temps que fai. Juga sus lo morau, sus lo fach de pas far de las activitats de paur que la meteo siá meschanta e sus lo fach de sentir de la frustracion disproporcionada quand fai pas lo temps esperat. Una partida de la populacion ne’n es sovent atencha sens lo saber e l’autra partida ne’n es tanben victima sovent sens lo saber… Mossurs e madamas quand a la fin de la jornada setz totalament chabats, esternits, tristes, deprimits benleu qu’avetz crosat tròp de pessimistas de la meteo.
Sovenetz vos avant de romegar que la plueja lava lo ciau, qu’apres la plueja lo brave temps e que plòu pas jamai sus las personas aürosas!
Matèu Brousseau coma l’equipa e Monica
Laisser un commentaire